Vyandarua zaidi ya 225,000 kugawiwa bure kwa Wananchi Bariadi.

 

Chandarua kwa ajili ya kumkinga Mama Mjamzito na Mtoto dhidhi ya Malaria.

 

 

Na Costantine Mathias, Bariadi.

 

SERIKALI kwa kushikiana na Shirika la Misaada la Marekani (USAID) linatarajia kutekeleza Kampeni ya Ugawaji wa Vyandarua 225,963 vyenye dawa katika Halmashauri ya wilaya ya Bariadi Mkoa wa Simiyu.

 

Vyandarua hivyo ambavyo vitagawiwa katika kata zote 21 na vijiji 84, zimelenga kutokomeza Ugonjwa wa Malaria ambapo kila mwananchi atagawiwa bure mara baada ya kujiandikisha.

 

Akizungumza juzi kwenye kikao cha kamati ya ushauri ya Wilaya ya Bariadi Bw.Winfred Mwafongo Afisa kutoka Wizara ya Afya alieleza kuwa kampeni hiyo inalenga kupunguza maambukizi ya ugonjwa wa malaria hivyo kupunguza vifo vinavyotokana na ugonjwa huo.

 

Aidha alifafafanua kuwa katika Halmashauri ya Wilaya ya Bariadi kampeni hii itatekelezwa katika kila kijiji hivyo wananchi wanatakiwa kuitikia kwa kujisajili ili waweze kupata vyandarua hivyo.

 

“Hii kampeni tunampa chandarua kila mwananchi lakini ili apate ni lazima aandikishwe halafu apate kuponi kusudi siku ya ugawaji anakuja na ile kuponi yake ndipo anapewa chandarua” alibainisha Bw.Mwafongo.

 

Alisema kuwa lengo la kugawa vyandarua hivyo ni kupunguza maambukizi ya malaria kutoka kwa mbu mwenye vimelea kwenda kwa binadamu huku lengo lingine ni kupunguza idadi ya wagonjwa wa malaria katika eneo husika.

 

Katika hatua nyingine Mwafongo aliwatoa hofu wananchi na kuwaeleza kuwa vyandarua hivyo havina madhara yoyote kwa mtumiaji, ambapo vimetolewa na serikali kwa lengo la kukabiliana na Malaria.

 

MWISHO.

 

Winfred Mwafongo Afisa kutoka Wizara ya Afya akiwasilisha maada kuhusu Mpango wa Serikali kugawa vyandarua bure kwa Wananchi wa wilaya ya Bariadi.

 

Watumishi wa Halmashauri ya wilaya ya Bariadi pamoja na Halmashauri ya Mji wa Bariadi.

Mwenyekiti wa CCM wilaya ya Bariadi Juliana Mahongo (aliyesimama) akizunguma wakati wa kupokea taarifa ya Vyandarua kutoka Wizara ya Afya, kulia ni Katibu wa CCM wilaya hiyo Masanja Salu, wa pili kushoto ni Mkuu wa wilaya hiyo Simon Simalenga na Mwenyekiti wa Halmashauri Mayala Lucas.

 

Je, una Tangazo, Picha za Matukio, Taarifa au Habari ungependa tuichapishe? Tafadhali, wasiliana nasi 0746057557 au 0765402289 au Email : simiyupresstz@gmail.com