Mitaa mitatu Maswa kupata Lami.

 

Kaimu Meneja wa Tarura Maswa,Mhandisi Francis Kuya akionyesha mitaro ya maji waliyojenga ili kulinda barabara katika Mtaa wa Lubala mjini Maswa.

 Na Samwel Mwanga,Maswa.

 

WAKALA wa Barabara wa Mjini na Vijijini (TARURA) wilaya ya Maswa mkoani Simiyu wanatarajia kujenga barabara za kiwango cha lami katika mitaa mitatu katika mjini wa Maswa.

 

Hayo yameelezwa na Kaimu Meneja wa TARURA wilaya ya Maswa,Mhandisi Francis Kuya wakati akizungumza na waandishi wa habari waliotembelea mji wa Maswa kujionea kazi zilizofanywa na Tarura.

 

Amesema kwa mwaka wa fedha 2023/2024 katika kuboresha barabara za mitaa katika mji huo licha ya kujenga mitaro ya maji ya mvua kwa sasa watajenga barabara za kiwango cha lami katika mitaa ya Lubala,Kapilima na Ziota.

 

Mhandisi Kuya amesema kuwa gharama za ujenzi huo ni kiasi cha Sh Milioni 500 ambazo zinatokana na Mfuko wa Jimbo la Maswa Mashariki.

 

"Baada ya kukamilika kwa ujenzi wa mitaro ya maji katika barabara zetu za kwenye mitaa sasa tunakwenda kuongeza barabara za kiwango cha lami kupitia fefha za mfuko wa jimbo,'"

 

"Mitaa ya  Lubala,Kapilima na Ziota iliyoko mjini Maswa barabara zake sasa zinakwenda kujengwa kwa kiwango cha lami," amesema.

 

Amesema kuwa tayari Mkandarasi wa ujenzi wa barabara hizo zenye urefu wa Kilomita moja amekwisha kupatikana na tayari ameanza kazi za awali ambazo ni pamoja na kuondoa mabomba ya maji,nguzo za umeme na kuondoa miamba ya mawe.

 

Mkuu wa wilaya ya Maswa,Aswege Kaminyoge ameipongeza serikali ya awamu ya sita kwa kuweza kuleta fedha nyingi wilayani humo kupitia Tarura hali ambayo inaifanya wilaya hiyo kuwa na barabara za kuweza kupitika kwa kioindi chote cha mwaka mzima.

 

Amesema kuwa miundo mbinu hiyo ya barabara ni lazima ilindwe kwa gharama zote na kuwaonya watu wote wanaohujumu miundombinu hiyo kuwa wakibainika watachukuliwa hatua kali za kisheria.

 

"Serikali inatumia pesa nyingi katika miundo mbinu hii ya barabara hivyo ni lazima tuilinde kwa gharama zote na wale watakaobainika kuhujumu miundombinu hiyo wakibainika ni lazima tuwachukulie hatua kali za kisheria kila mmoja awe mlinzi wa mwenzake," amesema.

 

Tarura katika wilaya ya Maswa imekuwa ikipokea fedha toka serikali kiasi cha Sh Bilioni 4.226 kwa mwaka kwa ajili ya kuboresha barabara za wilaya hiyo.

 

Fedha hizo zinatolewa na serikali kwa mchanganuo wa Sh Bilioni 2 za matengenezo ya barabara zinazotokana na tozo za mafuta,Sh Bilioni moja za Mfuko wa jimbo(jimbo la Maswa Mashariki sh Milioni 500 na Jimbio la Maswa Magharibi Sh Milioni 500)na Sh Bilioni 1.226 zinazotokana na Mfuko wa barabara.

Je, una Tangazo, Picha za Matukio, Taarifa au Habari ungependa tuichapishe? Tafadhali, wasiliana nasi 0746057557 au 0765402289 au Email : simiyupresstz@gmail.com