Mwili uliokutwa ndani ya Maji, Polisi wazungumza ,marehemu aliawa na mke wake.

 

Kamanda wa Polisi Mkoa wa Simiyu ACP Blasius Chatanda, akizungumza na waandishi wa Habari (hawapo Pichani) Ofisini kwake leo

Na Mwandishi wetu, Bariadi.

Jeshi la Polisi Mkoani Simiyu limetoa taarifa ya tukio la mwili wa mtu mmoja kukutwa ndani ya maji kwenye korongo la msimu wa Masunzu, ambalo limetokea jana katika Mtaa wa Mwaswale kata ya Sima, Halmashuari ya Mji wa Bariadi Mkoani Simiyu.

Mbele ya Waandishi wa habari Leo Kamanda wa Polisi Mkoani humo, Blasius Chatanda amesema kuwa, Mwili wa mtu huyo ulitambulika kwa jina la Boniphace Mdunguli (40-42) mkazi wa mtaa huo na alikuwa mfanyabiashara.

Kamanda Chatanda amesema kuwa baada ya kufanyika kwa uchunguzi, imebainika kuwa marehemu aliuawa kwa kunyongwa na waya shingoni na huku Mke wake aliyejulikana kwa jina la Salu Magambo akihusika katika mauaji hayo.

Kwa mujibu wa Kamanda huyo wa Polisi, marehemu kabla ya kufikwa na umauti akiwa na mke wake mnamo tarehe 01/04/2023 walikuwa pamoja kwenye mgahawa wa mke wake uliopo mtaa wa Sima na waliondoka kwa pamoja kwenda nyumbani.

Kamanda Chatanda amesema kuwa chanzo cha tukio hilo, ni ugomvi uliokuwepo awali kati ya marehemu na mke wake, ambapo walikuwa wanadaina pesa ambazo marehemu alikuwa anamdai mke wake.

“ Mtuhumiwa amekamatwa na mahojiano yanaendelea dhidi yake, lakini amekiri kuhusika na tukio hilo na alishirikiana na watu wengine kufanya tukio hilo, tunaendelea kuwasaka hao wahusika wengine,” amesema Chatanda.

MWISHO.

Je, una Tangazo, Picha za Matukio, Taarifa au Habari ungependa tuichapishe? Tafadhali, wasiliana nasi 0746057557 au 0765402289 au Email : simiyupresstz@gmail.com