MKUU
wa Wilaya ya Bariadi Mkoa wa Simiyu Simon Simalenga (katikati) akiwa
ameambatana na Wajumbe wa Kamati ya Siasa pamoja na Watalamu, wakitembelea na kukagua ujenzi wa kituo
cha Afya Miswaki, Kulia ni Mwenyekiti wa UVCCM wilayani humo Tinana
Masanja na kushoto ni Mjumbe wa Kamati ya siasa Tina Chenge.Na COSTANTINE MATHIAS, Bariadi.
KAMATI ya Siasa ya Chama Cha Mapinduzi (CCM) wilaya ya Bariadi Mkoani Simiyu imewataka watendaji wa serikali kuhakikisha wanasimamia vizuri ujenzi wa miradi ya serikali wakizingatia ubora na viwango.
Aidha, wametakiwa kukamilisha utekelezaji wa miradi kwa wakati ili wananchi waone tija na thamani ya fedha zinazotolewa na serikali ya awamu ya sita chini ya Rais Samia kwa ajili ya kuwahudumia.
Hayo yamebianishwa jana na Mwenyekiti wa CCM wilaya hiyo, Juliana Mahongo mara baada ya kukagua ujenzi wa Kituo cha Afya Miswaki kinachojengwa kwa gharama ya shilingi mil. 500.
Mwenyekiti huyo aliwataka watendaji kwa kushirikiana na Mkuu wa wilaya ya Bariadi (Simon Simalenga) kuhakikisha wanasimamia na kukamilisha kwa wakati.
‘’Tutakuwa tunapita hapa Miswaki mara kwa mara ili kuhakikisha mradi huu unakamilika na kuanza kutoa huduma kwa wananchi…hii ni hela ya Mama Samia na hatujui anaipata wapi, niaombe sana mbanane ili mradi huu ukamilike’’ alisema.
Alifafanua kuwa Chama Cha Mapinduzi wilaya ya Bariadi kinamshukuru sana Rais Samia kwa kuwaletea fedha kwa ajili ya ujenzi wa vituo vya afya ambavyo vimefikia vitano ambavyo ni Ngulyati, Matongo, Ng’wang’wali, Byuna na Miswaki.
Alisema lengo la ziara hiyo ni kujiridhisha na kuona utekelezaji wa fedha zinazoletwa na Rais Samia kwa ajili ya kuwahudumia wananchi.
‘’Naiagiza serikali, mapungufu yote ambayo hayajakamilika, mkamilishe kwa wakati…Wodi ya watoto ijengwe ili kupunguza vifo vya watoto kama serikali inavyoelekeza, taufuteni fedha na Mkuu wa wilaya kayasimamie mapungufu tuliyoyaona leo’’ alisema Mwenyekiti.
Naye Mjumbe wa Kamati ya Siasa ya wilaya ya Bariadi, Tinna Chenge aliitaka Halmashauri hiyo kuhakikisha wanatenga fedha kwa ajili ya ujenzi wa Jengo la watoto ili kudhibiti vifo vya watoto kama serikali inavyoelekeza.
Kwa upande wake Mkuu wa wilaya ya Bariadi Simon Simalenga aliihakikishia kamati ya siasa kuwa atasimamia fedha za serikali na hawatavumilia endapo kuna mianya ya rushwa na fedha kuliwa.
Simalenga aliitaka Kamati ya siasa kupita mara kwa mara kuendelea kukagua miradi ya maendeleo ili kuendelea kutoa hamasa kwa watendaji.
‘’Kwenye orodha ya miradi itakayokaguliwa awamu ijayo na mradi huu wa kituo cha Afya Miswaki ukaguliwe uwe umakamilika au laa..na hii ni salamu kwa mwenyekiti wa Halmashauri ili wajitafute fedha kukamilisha’’ alisisitiza Simalenga.
Akitolea ufafanuzi, Mkurugenzi Mtendaji wa Halmashauri hiyo Khalid Mbwana alieleza kuwa fedha iliyotolewa haiwiani na kiwango cha majengo wanayotakiwa kujenga.
‘’Kila Halmashauri iliamua kujenga majengo ya msingi ambayo ni Maabara, Jengo la Wagonjwa wa nje, Jengo la Upasuaji na Jengo la wakina mama…kati ya Halmashauri zilizofanya vizuri kwenye Mkoa wa Simiyu juu ya ujenzi wa vituo vya afya ni Halmashauri ya Wilaya ya Bariadi’’ alisema Mkurugenzi.
Aliongeza kuwa fedha kuisha, wameshawasilisha TAMISEMI maombi ya bajeti ya shilingi milioni 120 ili waweze kukamilisha majengo kwa asilimia 100.
Awali akisoma taarifa, Mratibu wa ujenzi wa kituo cha Afya Miswaki, Elisha Mtwewe alisema serikali ilitoa kiasi cha shilingi milioni 500 kwa ajili ya ujenzi wa kituo cha Afya Miswaki ili kuboresha huduma kwa wananchi.
Alisema mradi huo ulikabiliwa na mfumoko wa bei wakati wa ujenzi, umbali wa eneo la ujenzi kulingana na gharama za usafirishaji wa vifaa vya ujenzi hali ambayo ililazimika kutumia gharama kubwa kusafirisha vifaa vya ujenzi.
‘’Maombi ya fedha za ukamilishaji yameshawasilishwa Ofisi ya Rais-TAMISEMI, Mhandisi wa wilaya tayari ameshafanya tathimini na kubaini kiasi cha shilingi milioni 124 zinahitajika kwa ajili ya ukamilishaji’’ alisema Mtwewe.
MWISHO.
WAJUMBE wa Kamati ya Siasa wilaya ya Bariadi Mkoa wa Simiyu wakikagua ujenzi wa kituo cha Afya Miswaki.
Post a Comment