Jengo la kujifunguliwa katika zahanati ya
Nkiniziwa lililojengwa na shirika la World vision limekabidhiwa kwa uongozi wa
serikali ya wilaya ya Nzega mkoani Tabora.
Na Samwel Mwanga, Nzega
MKUU wa wilaya ya Nzega mkoani Tabora, Naitapaki Tukai amelipongeza Shirika la World Vision kwa kutekeleza mradi wa kujenga miundombinu ya huduma za Afya kwa kujenga jengo la kujifungulia kwa akinamama katika zahanati ya Nkiniziwa iliyoko wilayani humo.
Dc Tukai amesema hayo Novemba 15 mwaka huu wakati akizindua jengo hilo lililojengwa na Shirika la World Vision kupitia Mpango wa Maendeleo ya Jamii Ndala (Ndala AP) ambalo lina vyumba vitatu ikiwemo sehemu iliyotengwa kwa ajili ya kujifungulia akinamama ambayo pia ina vitanda kwa ajili ya kupatiwa huduma mara baada ya kujifungua.
Mpango wa Maendeleo ya Jamii Ndala (Ndala AP) unajumuisha Kata tatu za Ndala, Nkiniziwa na Puge zenye jumla ya vijiji 11 na unatekeleza miradi ya Ufadhili wa Watoto,Miradi ya Sekta za Afya na Lishe, Maji na Usafi wa Mazingira, Kilimo, Mifugo na Uchumi pamoja na Ulinzi na Utetezi wa mtoto.
Amesema kuwa serikali ya awamu ya sita inayoongozwa na Rais Dkt Samia Suluhu Hassan inapenda kuona akinamama wanajifungulia kwenye maeneo salama ndiyo maana inawapa fursa hata Wadau mbalimbali wa maendeleo kuisaidia kama Shirika la World Vision lilivyofanya.
“Nimefurahi sana kuona wakinamama wakiwa na watoto wao mmejitokeza kwa wingi kufika kwenye eneo hili ili kuweza kushuhudia uzinduzi wa jengo hili na hii inadhihirisha mmefurahishwa na msaada huu uliotolewa na Shirika hili la World Vision,” amesema kuongeza.
“Kwanza niwapongeze World Vision kwa msaada huu waliotupatia wa kutujengea jengo hili ambalo ni muhimu sana kwa ajili ya akinamama kujifungulia,mimi kwa niaba ya Rais Dkt Samia Suluhu niwashukuru sana na leo ninalizindua na bahati nzuri usiku wa kuamkia leo amezaliwa mtoto mmoja katika jengo hilo,”amesema.
Amesema kuwa shirika hilo limekuwa likiisaidia serikali ya wilaya hiyo katika sekta mbalimbali zikiwemo za Elimu, Afya, Maji katika kuwahudumia wananchi hivyo amewaagiza Viongozi wa Serikali na Watendaji walioko kwenye miradi iliyotekelezwa kuakikisha wanashirikiana ili kuona miradi hii inatunzwa na kulindwa kwa manufaa ya umma,
“World Vision wameshamaliza kazi yao suala la utunzaji kwa matumizi endelevu ni letu sisi watumiaji hivyo usimamizi wa karibu wa miradi hii kwenye maeneo yenu ni suala la msingi sana” alisisitiza Dc Tukai.
Ameongeza kuwa fedha zilizotumika kutekeleza miradi hiyo ni fedha ya ziada kutoka kwa Wananchi wa Ireland hivyo ni vema kuona thamani ya upendo wao kwa kulinda na kutunza majengo, na vifaa vyote vilivyonunuliwa kwa ajili ya miradi hii.
Awali Mratibu wa Mpango wa Maendeleo ya Jamii-Ndala (Ndala AP) Ngasa Michael akisoma taarifa ya Utekelezaji wa Miradi kwa mwaka wa fedha 2022/2023 walipokea kiasi cha Shilingi Milioni 600 kwa ajili ya utekelezaji wa miradi mbalimbali ya maendeleo ya Wananchi ukiwemo mradi huo wa ujenzi wa jengo hilo.
Amesema kuwa wamekuwa wakipata ushirikiano mkubwa kutoka katika serikali ya wilaya hiyo wakati wa utekelezaji wa miradi hiyo ndiyo maana wanafanikiwa na wataukabidhi mradi huo serikalini mara baada ya kukamilika kwa ujenzi wake.
Baadhi ya wakinamama waliokuwepo kwenye uzinduzi wa jengo hilo pamoja na kulipongeza Shirika hilo kutokana na ujenzi huo wamesema kuwa walikuwa wakitembea umbali mrefu wa zaidi ya kilomita 24 kwenda kutafuta huduma hiyo katika Kituo cha Afya Busondo lakini kwa sasa wataipata huduma hiyo katika zahanati hiyo.
“Huduma hii tuliyoletewa na Shirika la World Vision kwa kweli imetusogezea kwa sasa hatutatembea umbali mrefu wa kuifuata katika kituo cha afya Busondo ambacho kipo umbali wa kilomita 12 hivyo kwenda na kurudi tunatembea kilomita 24,” amesema Felister Emanuel.
Neema Mgode anasema kuwa walikuwa wakitumia gharama kubwa ya fedha za nauli kwenda kupata huduma hiyo katika Kituo Cha Busondo ila kwa sasa hakuna gharama ya nauli wanayotumia kwenda kupata huduma hivyo kwa sasa wanatembea umbali mfupi tu.
Mganga Mfawidhi wa Zahanati hiyo, Gasper Ernest ameiomba serikali kuipatia vifaa tiba kwani kwa sasa ina upungufu mkubwa pamoja na upungufu wa nyumba za watumishi hali ambayo inawafanya wafanye kazi zao katika mazingira ambayo si rafiki sana.
Katika hatua nyingine,Mkuu wa wilaya ya Nzega,
Naitapaki Tukai amekabidhi vyerehani 41 na vyeti kwa wasichana wanaotoka katika mazingira magumu waliopatiwa mafunzo ya miezi mitatu ya ushonaji nguo pia amekabidhi vyoo vya kisasa na manawio ya mikono kwa ajili ya wanafunzi wa Shule za Msingi Nkiniziwa na Shule ya Msingi Kipugala miradi yote hii ni sehemu ya utekelezaji wa Miradi ya Maendeleo kupitia Mpango wa Maendeleo ya Jamii-Ndala (Ndala AP).
MWISHO.
Baadhi
ya akinamama wakiwa na watoto wao wakishuhudia uzinduzi wa jengo la
kujifungulia katika Zahanati ya Nkiniziwa wilaya ya Nzega mkoa wa Tabora
iliyojengwa na shirika la World Vision.
.JPG)
إرسال تعليق