Na Samwel Mwanga,Maswa
MAMLAKA ya Maji na Usafi wa Mazingira Mjini Maswa (MAUWASA) itaboresha hali ya upatikanaji wa maji katika mji wa Maswa na vijiji 18 mara baada ya kupata pampu mpya tano za kusukuma maji kutoka Wizara ya Maji.
Mkurugenzi Mtendaji wa MAUWASA, Mhandisi Nandi Mathias amesema hayo Desemba 12 mwaka huu mara baada ya kumaliza kazi ya ufungaji wa pampu hizo kwenye mitambo ya kusambaza Maji iliyoko katika bwawa la New Sola (Bwawa la Zanzui) ambacho ndicho chanzo kikuu cha maji cha mamlaka hiyo.
Amesema kuwa pampu hizo ambazo zimenunuliwa na Wizara ya Maji kwa kushirikiana na Mauwasa kwa gharama ya Sh Milioni 779 ni sehemu ya pampu 16 ambazo zinapaswa kununulia ili kuboresha hali ya upatikanaji wa Maji katika mji wa Maswa na Vijiji vipatavyo 18.
Mhandisi Nandi amesema kuwa pampu zilizopo za kusukuma maji ambazo ni 16 ni za muda mrefu na kwa sasa zimechakaa na ufanisi wake wa utendaji wa kazi umeshuka kwa asilimia 70 na zilifungwa mwaka 1989 na sasa zimefikisha miaka 34 na zilipaswa kutumika kwa miaka 10 na baadaye zibadilishwe.
"Tunazo pampu 16 katika mitambo yetu ya kusukuma maji kutoka bwawani kwenda kwa wananchi lakini pampu hizo ni za muda mrefu tangu zifungwe mwaka 1989 sasa ni miaka 34 zimechakaa na hata utendaji kazi wake yaani ufanisi umepungua kwa asilimia 70 kitaalamu zilipaswa zibadilishwe baada ya miaka 10,”amesema
Amesema kutokana na hali hiyo hata gharama za matengenezo zimekuwa kubwa pamoja na pampu hizo kutumia kiasi kikubwa cha umeme na kuongeza gharama za uendeshaji kuwa kubwa kwa mamlaka hiyo sambamba na maeneo mengine kutopata huduma ya Maji.
"Pampu zikiwa chakavu ni tatizo zinatuingiza gharama kubwa ya matengenezo ya mara kwa mara na hata umeme unaotumika kuziendesha ni mwingi na hivyo Mamlaka kubeba mzigo mkubwa wa uendeshaji na kuna baadhi ya maeneo Maji hayafiki kutokana na pampu kutokuwa na nguvu ya kutosha ya kusukuma maji,"amesema.
Ameendelea kueleza kuwa kupatikana kwa pampu hizo kutapunguza baadhi ya changamoto hizo huku akitolea mfano kila mwezi wamekuwa wakilipa kiasi cha Sh Milioni 30 kwa ajili ya umeme lakini kwa sasa wanaweza ku;lip ash Milioni 25 na yale maeneo ambayo yalikuwa hayapati maji kabisa hasa ya vijijini kutokana na uchakavu wa pampu hizo yatapata maji.
Aidha ametumia fursa hiyo kuishukuru Wizara ya Maji na kumshukuru Rais wa Awamu ya Sita Dkt Samia Suluhu Hassan kwa kukubali kutolea kwa fedha kwa ajili ya ununuzi wa pampu hizo na kuomba pampu zilizobaki ambazo ni 11 nazo zinunuliwe ili waweze kutoa huduma bora ya maji safi na salama kwa wananchi wanaowahudumia.
Naye Suzana John mkazi wa kijiji cha Zanzuia ameiomba Mauwasa kuhakikisha kuwa wananchi wa maeneo hayo yanapata maji kwa muda wote mara baada ya kufungwa kwa pampu hizo ili nao waweze kupata huduma ya maji safi na salama.
"Tumefurahi kwa jinsi serikali kupitia Mauwasa inavyowajali wananchi wa wilaya ya Maswa ili waweze kupata huduma ya Maji safi na salama kwa kutuletea pampu hizo mpya,”
" Ninaamini na nyingine zitakuja hivyo hizi zilizokuja zimefungwa zianze kazi ili sisi tulioko maeneo ya vijijini tupate Maji muda wote kama wanavyopata wa mjini tusiwe na siku za mgao kama ilivyo sasa,"amesema.
MWISHO.
Jengo
la kuhifadhia pampu za kusukuma maji lililoko kwenye eneo la Bwawa la New Sola
ambalo linahifadhi pampu za kusukuma maji za MAUWASA.
Mafundi
wakiendelea na kazi ya ufungaji wa pampu mpya za kusukuma maji katika mtambo wa
kusukuma maji iliyoko katika Bwawa la New Sola katika kijiji cha
Zanzui wilaya ya Maswa.
Mkurugenzi
Mtendaji wa MAUWASA, Mhandisi Nandi Mathias akizungumza na waandishi wa habari (hawapo
pichani) juu ufungwaji wa pampu mpya tano za kusukuma maji katika mitambo ya
kusukuma maji iliyoko katika bwawa la New Sola katika kijiji cha Zanzui wilaya
ya Maswa.
Post a Comment