Waziri atoa wiki mbili kituo cha Afya kifanye kazi.

 

Naibu Waziri Ofisi ya Rais – TAMISEMI, Dkt. Festo Dugange akitoa maelekezo kwa viongozi wa Wilaya ya Itilima na Mkoa wa Simiyu, mara baada ya ziara yake ya siku moja Wilayani humo leo.

Naibu Waziri Ofisi ya Rais – TAMISEMI, Dkt. Festo Dugange akikagua baadhi ya majengo katika Hospitali ya Wilaya ya Itilima Mkoani Simiyu.

Naibu Waziri Ofisi ya Rais – TAMISEMI, Dkt. Festo Dugange akitoa maelekezo kwa viongozi wa Wilaya ya Itilima na Mkoa wa Simiyu, mara baada ya ziara yake ya siku moja Wilayani humo leo. (Picha zote na Derick Milton)

Na Derick Milton, Itilima.

Naibu Waziri Ofisi ya Rais – TAMISEMI, Dkt. Festo Dugange ameagiza viongozi wa Wilaya ya Itilima na Mkoa wa Simiyu, kuhakikisha hadi kufikia Februari 01, 2023 kituo cha Afya Mwanunda kinaanza kufanya kazi na wananchi wanapata huduma.

Kituo hicho ambacho kipo katika Wilaya hiyo, baadhi ya majengo yamekamilika ujenzi wake asilimia 100, ambapo Naibu Waziri amesema watalaamu Idara ya Afya Wilaya na Mkoa washirikiane na kuhakikisha hadi kufikia muda huo kituo kinaanza kufanya kazi.

Dkt. Dugange ametoa maagizo hayo leo alipofanya ziara ya siku moja Wilayani huyo na kutembelea ujenzi wa kituo hicho, huku akiridhishwa na ujenzi wa majengo yaliyokamilika na kueleza kuwa yanaendana na thamani ya pesa.

Amesema kuwa hadi kufikia tarehe hizo, mganga mkuu wa Wilaya na Mkoa, wahakikishe dawa zinakuwepo kwenye kituo hicho pamoja na watoa huduma ili wananchi waanze kupata huduma haraka iwezekanavyo.

Amesema kuwa ameelezwa kuwa kuchelewa kutoa huduma kwa kituo hicho inatokana na kutokamilika kwa taratibu za usajili, ambapo ameelekeza watalaamu hao kufuatilia usajili Wizara ya Afya ndani ya wiki moja.

“ Ndani ya wiki mganga mkuu wa Wilaya na wa mkoa, mshirikiane kituo kipate usajili, tumekubaliana hadi tarehe 01 Februari, 2023 wananchi waanze kupata huduma hapa, hivyo hakikisheni dawa zinakuwpo, vifaa tiba na watalaamu” amesema Dkt. Dugange.

Aidha Naibu Waziri huyo amemwagiza Mkurugenzi wa Halmashauri hiyo Elzabert Gumbo kuhakikisha huduma ya maji inakuwepo kituoni hapo, pamoja na huduma ya umeme.

“ Tumeona hapa hakuna huduma ya umeme, pamoja na Maji, Mkuu wa Wilaya amesema atafanyia kazi huduma ya umeme, Mkurugenzi hakikisha huduma ya maji inakuwepo hapa kabla ya kituo hakijaanza kufanya kazi, lakini kamilisheni baadhi ya majengo ambayo bado hajakamilika,” amesema Dkt. Dugange.

Awali akisoma taarifa ya ujenzi wa kituo hicho Kaimu Mganga mkuu Wilaya hiyo Oswin Mlelwa amesema kuwa serikali ilitoa kiasi cha Sh. Milioni 500 kwa ajili ya ujenzi wa kituo hicho.

Amesema kuwa halmashauri ilipokea kiasi hicho na kuanza ujenzi, ambapo jengo la wagonjwa wa nje, maabara, na kichomea taka yamekamilika asilimia 100 huku ujenzi ukiendelea kwenye jengo ya wodi ya wazazi, jengo la kufulia pamoja na jengo la upasuaji.

Baadhi ya wananchi waliozungumza mbele ya Naibu Waziri wameishukuru serikali kwa kuwaletea kituo cha Afya, kwani awali walikuwa wakiangaika kwenda Wilayani Bariadi kupata huduma.

“ Tulikuwa tunakwenda Wilaya ya Bariadi kupata huduma, akina mama wajawazito wamepoteza maisha na watoto wao, kutokana na umbali lakini miundombinu ya Barabara kutokuwa rafiki” amesema Ng’wandu Masatu.

MWISHO.

Je, una Tangazo, Picha za Matukio, Taarifa au Habari ungependa tuichapishe? Tafadhali, wasiliana nasi 0746057557 au 0765402289 au Email : simiyupresstz@gmail.com